Euskal Autonomia Erkidegoko elikagaien eta zuraren katea digitalizatzeko laguntzak

Xedea

Euskal Autonomia Erkidegoko elikadura-katearen eta zuraren industriaren digitalizazioa txertatzen eta sustatzen laguntzea, industria horren lehiakortasuna hobetzeko.

Hartzaileak

a) Enpresak, edozein forma juridiko dutela ere; honela sailkatuko dira:

1) Enpresa txiki eta ertaina (ETE):

• Mikroenpresa: 10 pertsona baino gutxiago okupatzen dituena eta urteko negozio-bolumena edo urteko balantze orokorra 2 milioi eurotik beherakoa duena.

• Enpresa txikia: 50 pertsona baino gutxiago okupatzen dituena eta urteko negozio-bolumena edo urteko balantze orokorra 10 milioi eurotik beherakoa duena.

• Enpresa ertaina: gutxienez 50 pertsona okupatzen dituena, baina gehienez 250 pertsona baino gutxiago, eta urteko negozio-bolumena 50 milioi eurotik gorakoa ez duena edo urteko balantze orokorra 43 milioi eurotik gorakoa ez duena.

2) Enpresa handia: enpresa txiki eta ertainen definizioan jasotzen ez diren enpresak.

b) Elkarteak

c) Enpresa-taldeak

d) Nortasun juridikorik gabeko pertsona fisiko edo juridiko pribatuen elkarteak eta ondasun-erkidegoak. Bertan parte hartzen duten enpresa guztiak izango dira onuradunak, eta guztiek bete beharko dituzte agindu honetan ezarritako betekizun eta baldintzak. Elkarte horiek beren beregi adierazi beharko dituzte eskabidean elkarteko kide bakoitzak bere gain hartutako gauzatze-konpromisoak, bai eta horietako bakoitzari aplikatu beharreko diru-laguntzaren zenbatekoa ere, horiek ere onuraduntzat hartuko baitira. Nolanahi ere, taldeko ordezkari edo ahaldun bakar bat izendatu beharko dute, onuradun gisa elkarteari dagozkion betebeharrak betetzeko ahalorde nahikoarekin, eta kide bat izendatu beharko dute funtsen hartzaile gisa, eta hark banatuko ditu taldeko gainerako kideen artean. Elkartea ezin izango da desegin Euskadiko Ogasun Nagusiaren Antolarauei buruzko Legearen testu bateginaren 44. artikuluan eta 32.m) artikuluan aurreikusitako preskripzio-epea igaro arte.

Laguntza hauetan adierazitako proiektuetarako, onuradunek alta emanda egon beharko dute Jarduera Ekonomikoen gaineko Zergan, Ekonomia Jardueren Kode Nazionalaren (EJKN) epigrafe hauetan.

3. oinarriko 3.c lerroan adierazitako proiektuetarako laguntzak jasotzeko, onuradunek behi-, ardi-, ahuntz- eta zaldi-azienden ustiategien titularrak izan beharko dute, eta ustiategi horiek, lehenik eta behin, beren ustiategia Nekazaritza Ekoizpenaren Erregistro Orokorrean inskribatuta egon beharko dute (urtarrilaren 16ko 9/2015 Errege Dekretuak sortu zuen, nekazaritza-ekoizpen primarioan higiene-araudia aplikatzeko baldintzak arautzen dituenak), edo, bestela, Euskal Autonomia Erkidegoko Nekazaritza Ustiategien Erregistroan inskribatuta egon beharko dute (Euskal Autonomia Erkidegoko Nekazaritza Ustiategien Erregistro Orokorrari buruzko irailaren 27ko 203/2011 Dekretuak sortu zuen erregistro hori); eta, bigarrenik, lau baldintza hauetakoren bat bete beharko dute:

a) Esnetarako behi-azienda duen abeltzaintzako ustiategi baten titularra izatea, baldin eta 2024an aurkeztu badute abenduaren 27ko 1048/2022 Errege Dekretuan aurreikusitako eskaera bakarra. Dekretu hori 2023tik aurrera zuzeneko ordainketen bidezko esku-hartzeak aplikatzeari eta Nekazaritza Politika Erkidearen Plan Estrategikoaren esparruan betekizun komunak ezartzeari buruzkoa da, bai eta kudeaketa- eta kontrol-sistema integratuaren eskaera bakarra arautzeari buruzkoa ere.

b) Haragitarako behi-azienda duen abeltzaintzako ustiategi baten titularra izatea, baldin eta 2024an aurkeztu badute abenduaren 19ko 1075/2014 Errege Dekretuan aurreikusitako eskaera bakarra, eta bertan gutxienez 15 abere zehaztu badira behi ume-hazleak mantentzeagatik lotutako laguntza ordaintzeko.

c) Ardi-azienda duen abeltzaintzako ustiategi baten titularra izatea, baldin eta 2024an aurkeztu badute abenduaren 19ko 1075/2014 Errege Dekretuan aurreikusitako eskaera bakarra, eta bertan gutxienez 200 abere zehaztu bazaizkio.

d) Zaldi-azienda duen abeltzaintzako ustiategi baten titularra izatea, 2024an, derrigorrezko urteko aitorpena.

e) Ahuntz-azienda duen abeltzaintzako ustiategi baten titularra izatea, 2024an derrigorrezko urteko aitorpena aurkeztu badute.

Deskribapena

Diruz lagun daitezkeen laguntza-ildoak eta jarduerak:

– Enpresei digitalizazioan hastean laguntzeko laguntzak. Laguntzaren intentsitatea % 60ra irits daiteke, eta laguntzaren muga 50.000 eurokoa izango da mikro, ertain eta enpresa txikien kasuan. Gainerakoen kasuan, laguntzaren intentsitatea % 30era iritsi ahal izango da, 50.000 euroko mugarekin.
– Digitalizazio-fase aurreratuan dauden eta 4.0 teknologia sartzea bilatzen duten enpresentzako laguntzak. Laguntzaren intentsitatea % 70ra irits daiteke, eta laguntzaren muga 100.000 eurokoa izango da mikro, ertain eta enpresa txikien kasuan. Gainerakoen kasuan, laguntzaren intentsitatea % 45era iritsi ahal izango da, 100.000 euroko mugarekin. Proiektu estrategikoen kasuan, laguntzaren muga 200.000 eurokoa izango da kasu guztietan.

Laguntza mota

Konkurtsala